Kisah Palui: Tacabur Ka Licak

KISAH PALUI: TACABUR KA LICAK

...........
Sudah samingguan ini, Palui pina manggarunum haja gawiannya, kada tahu baisukan, siang wan malam, pina kada baampihan manggarunum.

Dimapa kada kaya itu kalakuan, jalan dikampung nang sudah rusak lima tahun hanyar tiga bulan dibaiki, tarnyata rusak pulang. Kada sawat saumur jagung.

Sabujurnya, Palui tu...Pick Nang Ini Wal Baca Satarusnya....
..............
Source: BPost

Kisah Palui: Anggota KPU

PARAK pulang pamilukada gasan mamilih Kapala daerah lawan wakilnya. Palui taumpat jadi panitia pamilukada dikampungnya. Macam-macam parsiapan gasan pamilukada tahun ini. Kurang labih kaya pamilukada samalam, cuma amun gawian tanyaman pamilu pilpres, kada banyak calonnya. Nang tauyuhi cuma mandata ulang DPT-nya haja.

“Kaya apa Lui, ikam siap hajakah?” ujar Tulamak manakuni Palui.

“Insya Allah siap banar, sabab samalam kami sudah mandata ulang DPT, supaya kada camuh kaya samalam,” ujar Palui mamadahi.

“Syukur ai mun kaya itu,” ujar garbus jua.

Rahatan buhannya asik bapanderan, datang julak Ijul baparak handak minum di warung acil Irus.

“Napa nang dipanderakan Lui pina bapicik banar?” ujar julak managur Palui wan

kawalannya.

“Kami mamader parsiapan pamilukada kaina lak ai,” sahut Palui.

“Aku sudah didaftar kalu Lui? Jangan tatinggal lagi kaya samalam,” ujar julak maingatakan Palui.

“Aman ja lak ai, apalagi pian tamasuk anggota KPU jadi kada usah dicatat lagi,” ujar Palui pulang.

“Pabila Lui julak Ijul diangkat urang jadi anggota KPU?” ujar Tulamak hiran

mandangar Palui mamadahi julak Ijul anggota KPU.

“Nah bubuhan ikam kada tahu kah bahwa julak ini anggota KPU?” ujar Palui.

“Ikam jangan maada-ada Lui ai, satahuku sidin tu badagang minyak ja... kada suah

malihat sidin tulak kakantor KPU sana,” ujar Garbus mangaramputakan.

“Amun bubuhan ikam kada pacaya, takuni langsung sidinnya,” ujar Palui.

“Bujur kah lak pian anggota KPU,” ujar Tulamak manakuni julak.

“Bujur banar Mak ai, waktu aku baumur 50-an sudah jadi anggota KPU,” ujar julak

mambujurakan pander Palui.

“Nah iya kalu, julaknya sudah ma-akui,” ujar Palui takurihing.

“Hadang dahulu, aku pina kada nyaman galagat nah,” ujar Tulamak marasa kana gawi.

“Buktiakan lak bahwa pian tamasuk anggota KPU,” ujar Palui manyuruh julak mambuktiakan.

“Ini lihati Mak rambutku putih bahuban kada?” ujar julak Ijul mamacul ka kupiah sidin.

“Napa hubungannya rambut bahuban lawan anggota KPU?” ujar Garbus kada paham.

“Julak ini anggota KPU alias bubuhan ‘Kapala Panuh Uban’. Bujur kalu kapala sidin

hibak lawan huban?” ujar Palui mangalakak tatawa.

“bujur jua sakalinya kita digawinya pulang,” ujar Tulamak gagarunum.

“Makanya bakawan lawan Palui tu harus sabar-sabar, supaya tahan bila diakalinya,” ujar julak Ijul umpat mahuhulut. Ranai Garbus wan Tulamak kada sing bunyian lagi. (bpost/fai)

Source: BPost

Kisah Palui: Kadada Lawannya

WAYAH musim kamarau, gawian pahumaan kadada dan banih di kindai parak habis, Palui tapaksa bajujual nang ada. Di antaranya manjuali hayam haraguannya karna sudah ganalan.

Kamarian samalam, Tulamak umpat manukari hayam parinduannya, sadangkan Garbus umpat jua manukari hayam jagaunya.

Kanapa maka ikam katuju manukari hayam jagaunya Bus? ujar Tulamak.

Hayam jagau ini gasan mudal, kada gasan dimakan, sahut Garbus.

Sama haja aku manukari hayam parinduan ini gasan mudal jua. Hayam parinduan ini kulakiakan, bahintalu lalu hintalunya mamacah maka aku cagar banyak baisian hayam, ujar Tulamak himung.

Sama haja hayam jagauku ini gasan mudal jua, kubawa gasan basaung, bataruhan dan pasti manang. Nah, duit kamanangan itu kawa kutukarakan sapida mutur lalu sapida muturnya gasan maujek.

Apalagi hayam jagauku ini paharatnya pambintihan wan kada kawa malihat hayam bini langsung haja manyasahi dan mengawini,” ujar Palui.

“Hayam jagau ini paharatan naik bujang, rangsang banar dan di wadahnya kadada lawannya.”

Artinya, harat banar, ujar Garbus sama himungnya wan Tulamak.

Isuk imbah Garbus wan Tulamak bahaharatan hayamnya gasan mudal usaha, Garbus mahalunyur mandatangi Palui. Ada apa Bus maka pina bakakajutan datang? Kaya apa hayam jagau samalam, harat kalu? ujar Palui.

Harat napanya? Sudah kucuba handak kusaung wan hayam jagau Tuhabuk, tapi nyatanya balum dilapas dihadapakan sudah pina kakalapak handak bukah, ujar Garbus pina sarik.

Hayam jagau saungan itu sabalum disaung harus dibanyun-banyun, dipusuti, dicium-cium jambul babalungannya, ujar Palui manasihati.

“Sudah jua kucuba macam-macam, dua talu kali napa nang ikam sambat itu, tatap haja hayam gajauku pina keok handak bukah katakutanan. Jadi kada bujur ucapan ikam samalam nang mamadahakan bahwa hayam jagau ini kadada lawannya.”

“Nyatanya, pina katakutanan sabalum babintih. Kalu bujur-bujur hayam jagau saungan, sabalum dilapas basaung sudah pina mamburangsan. Ikam pangaramput banar Lui ai,” ujar Garbus handak mambulikakan hayamnya.

Kalu barang sudah sama-sama ba-akad jual beli, kada kawa dibulikakan lagi, ujar Palui.

“Ikam kada mandangarkah ucapanku samalam bahwa hayam jagauku itu di sakuliling rumahku ini sama sakali kadada lawannya, karna di sini kadada hayam jagaunya, nang ada samunyaan hayam

bini, apalagi rumahku ini manununggal di pahumaan jadi sama sakali kadada lawannya.”

“Jadi ikam nang salah dangar. Hayam jagauku itu kadada lawannya kada ba-arti mangalahakan jagau-jagau lainnya, ujar Palui manjalasakan.”

Ooo ... kaya itukah Lui, kalu kaya itu isuk kusumbalih haja gasan basalamatan, ujar Garbus kakalahan karna tasalah tafsir sual kadada lawannya itu. (rep)

Source: BPost

Kisah Palui: Julak Sakit TBK

JULAK Dijah, mamarina Palui, bulik matan Puskesmas, singgah ka rumah Palui. Sidin sudah tuha, bajalan bapayung sambil batungkat kayu, ta undur tamara. Babaya sampai dimuhara lawang sidin langsung manangis baurut dada.

"Hau...kanapa pian Lak?" ujar bini Palui sambil mambawai sidin masuk.

"Aku tadi ka Puskesmas handak pariksa darah wan minta ubat," ujar julak sambil manyapui banyu mata. "Ulih mantri aku sudah dipariksa wan dibari ubat".

"Lalu kanapa lagi sampian sadih? ujar Palui

"Tadi itu, wayah kami mahadang panggilan mantri kami sasama tuha sampat mandengarkan caramah duktur. Ujar duktur, wayah ini tibi...tibi...cah aku kada ingat napa ngarannya..." ujar Julak bapicik kapala.

"Penyakit TBC kah Lak? ujar Palui

"Naah....itunah!" ujar Julak Dijah.

"Ujar duktur panyakit TBC mambunuh sampai 50 urang satiap jamnya dibanua kita, nang kaya jua di banua India wan Cina.

"Umai...kaya itukah Lak?" "Ini talingaku saurang mandangar wan duktur." ujar Julak mayakinkan.

"Anu....Lak, sampian sudah dipariksa dan dibari ubat gasan diminum, lalu ujar mantri sampian ini garing napa?" takun Palui, ma-anyaki.

"Ujar mantri itu, panyakitku ini....nah aku kalumpanan pulang...panyakut tibi... tibi...itu pang," ujarnya

"Tapi sampian batuk-batuk kah, Lak?" takun Palui.

"Kada!" ujar Julak bauling kapala.

"Anu Lakai, urang nang sakit tibici itu ialah urang pambatuk siang atau pun malam, batuk badahak, batuk mangikil, batuk darah Lakai."

"Aku ini Lui-ai, hanya bapanyakitan parut, parutku bobong, tapi bila aku bakantut, hanyar rasa lapang. Aku kada kawa pisah minyak kayu putih" ujar Julak Dijah.

"Ui julak, pak mantri Puskesmaskah nang manyambatkan sampian ini bapanyakit tibici?" ujar Palui.

"Hi-ih, aku takutan. Aku handak ai lagi hidup, baumur panjang," jar Julak marista.

"Julak-julak, amun pian kada batuk-batuk, baapa pian takutan wan TBC? Kaluhan pian cuma parut bobong haja kalu. Artinya pian bukan bapanyakit tibici, tapi....sakit Tibika (TBK).

"Umalahai, penyakit napa pulang itu?" ujar bini Palui.

"TBK itu artinya adalah Tidak Bisa Kentut" ujar Palui mangalakak.

Bini Palui wan anak-anaknya badarau mananawakan nininya.

"Makin rancak pian bakantut, julakai makin baik, hilang panyakit tibika-nya. Yapi sampian ingatakan jua, kalu handak bakantut dilihatlihat dahulu sakulilingan, kalu urang banyak haratan makan, minum, jangan simbarang malapas angin itu, kaina pian dicap urang "Kantut lalian"

Ha ha ha... cucu-cucu tatawaan.

"Muyak!" ujar Julak kawalahan, lalu ma-ambil bantal, barabah. (bpost/aan)

( Syamsul Farhan / BPoston

Source: BPost

Kisah Palui: Ciri madu Asli

MAMARINA Palui nang di Tanjung baelang ka rumah Palui. Mamarinanya itu gawiannya batarnak lebah, sakaligus bajual madu. Kabujuran ka Banjar sidin mambawa babarapa botol kalukalu ada nang handak manukari.

“Ni nah cirinya Lui. Amun nang asli tu kada dihurung samut. Bila dibuat ka kulkas kada baku atawa mangantal. Rasanya manis asli, amun dicucul lawan korek api, banyala,” ujar mamarina Palui manjalasakan. “Cuba lihati aku manyuculnya wan api,” ujar sidin handak mambuktiakan kaaslian madu bawaan sidin. Sakalinya dasar bujur malindap wayah dicucul sidin.

“Dasar bujur asli. Ayu ja ulun umpat manukar sabotol lak ai,” ujar Palui limbah malihat mamarinanya mantes manyucul wan korek.

“Pacang kada kasandangan bini ikam malam ini,” ujar mamarinanya langsung maambilakan ka botol nang sudah ba-isi madu.

“Tapi ada lagi pabidaan madu asli lawan nang palsu nang balum pian sambat lak ai,” ujar Palui lihum.

“Satahuku nang kusambat tadi sudah langkap banar, ada lagikah nang lain?” ujar mamarinanya handak tahu.

“Ada lagi lak ai. Kalu madu nang palsu itu cirinya katuju badadiaman haja, kada katahuan lih bini tuha alias basalingkuhan haja, kada dikawini,” ujar Palui lihum.

Rupanya mamarina Palui paham arah panderan anak kamanakannya itu.“Kalu ciri madu nang bujur-bujur asli pang kaya apa Lui?” ujar sidin.

“Nah kalu madu nang asli itu dasar bujuran dikawini alias asli bini anum. Dan kada kawa dibawa atawa dikumpulakan wan bini tuha, bisa dirungkau lih bini tuha....,” ujar Palui tatawa.

“Bujur banar Lui ai, kada suah aku manamui bini tuha hakun dimadu, pasti dikacaknya mun dikumpulakan,” ujar mamarina Palui mambujurakan pander palui. (bpost/fai)

( Dheny / BPostonline )

Source: BPost

Kisah Palui: Marga Nyamuk

PALUI laki bini sudah anam tahun hidup bakaluarga, tapi Garbus nang tinggal di sabalah rumah kada suah mandangar ada hual apalagi sampai bakakancangan urat gulu.

“Aku himung banar Lui ai ikam laki bini pina rukun banar,” ujar Garbus.

“Itulah barakat kawin sama-sama handak, artinya kada dipaksa ulih urang tuha,” sahut Palui.

“Biasanya biarpun samasama handak, pasti ada wayah basasarikan atawa bahualan,” ujar Garbus.

“Kalu sual basasarikan pasti ada tapi kami samasama manjaga supaya jangan mangaluar kadangaran urang,” ujar Palui.

“Umpamanya sual napa Lui,” ujar Tulamak batakun.

“Paling-paling kami bahualan karna bacacamburuan, maklum kami masih sama-sama anum, jadi banyak nang mahandaki sahut Palui.

“Kalo sual bacamburuan adalah sual biasa karna itu sifat manusia, camburu tandanya sayang,” ujar Tulamak.

Kada lawas bubuhannya bapapanderan sual camburu dan sual bahualan laki bini, datang Tuhirang sambil mahuhulut Palui.

“Kanapa Lui maka malam samalam ikam kulihat guring di gardu padahal kita kadada lagi kamling?” ujar Tuhirang manakuni Palui.

“Hau, kanapa Lui?” ujar Tulamak umpat batakun.

“Sual halus, sual sepele,” sahut Palui.

“Tadi ikam bapadah kada biasa bahual wan bini, tapi nyatanya kanapa maka ikam guring di gardu sampai kanyamukan?” ujar Garbus.

“Sual sepele marga nyamuk,” balas Palui.

“Kalu cuma gara-gara nyamuk, harusnya kada usah bapisah ranjang segala. Cuba pang kisahakan,” ujar Tuhirang.

“Samalam, imbah tuntung sambahyang maghrib, kami sakaluargaan dudukan di palatar, tamasuk mintuhaku. Karna hari kadap maka banyak banar nyamuk, nginging bunyinya parak talinga.

Karna kada kaburuan maka langsung kutapaki wan tangan. Wayah itu kulihat ada nyamuk nang hinggap di kapala sidin nang longor, mulanya handak kujantik tapi takutan luput kada kana nyamuknya. Imbah kupikirpikir lalu kada jadi kujantik tapi langsung kutapak saling gancangan, sampai mintuhaku takuriak kasakitan.....” ujar palui bakisah.

“Rupanya tapakanku tadi kagancangan sama wan tampilingan hingga sidin bakuriak kasakitan,” ujar Palui. “Nahhh..... marga nyamuk itulah panyababnya, maka aku disuruh sidin bajauh tapaksa guring di gardu,” ujar Palui pina marista.

“Kalo kaya itu bujur hja Palui kada biasa bakalahian wan bini tapi panyababnya adalah tatampiling kapala mintuha,” ujar Garbus mambila Palui.

“Aku sadar ujar Palui, samustinya sayang wan nang anak harus sayang jua abah umanya......” ujar Palui nang sabujurnya inya dasar matan lawas sudah handak banar manampiling mintuhanya nang panyarikan wan ingkin nitu. Sakalinya niatnya dasar katulusan jua. (tam)

Source: BPost

Kisah Palui: Kacamata Mambaca

GARBUS wan Tulamak sudah babulan-bulan umpat prugram kajar paket A tapi tatap kada lancar mambaca. Mungkin utak bubuhannya itu sudah katuhaan, makanya kada kuat lagi mahafal. Makanya bubuhannya badua itu manyasal banar, kanapa wayah lagi anum dahulu kada hakun umpat sakulah.

“Kita kada parlu manyasal Bus ai, biar haja kita bungul mambaca asal kita kawa manyakulahakan anak,” ujar Tulamak.

“Hi-ih, sabujurnya sual baca tulis itu kada tapi parlu jua karna biarpun kada sakulah, buta huruf, buta kakap pasti paham haja haraga duit nang batulisan saribu, lima ribu, sapuluh ribu habang sampai saratus ribu nang bagambar Soekarno Hatta,” ujar Garbus.

“Napa pina rami mamander bacaan tulisan ribuan,” ujar Palui nang hanyar datang umpat batakun.

“Kami bakisah sual sakulah paket A Lui ai, sudah babulan-bulan balajar balum bisa jua mambaca. Tulung pang kaya apa caranya, maka ikam bisa lancar banar mambaca,” ujar Garbus.

“Kalu si Palui kada kawa diumpati karna inya sudah biasa sakulah dan sudah biasa bagawi di kantur pambakal,” ujar Tulamak.

“Tapi biarpun inya sudah sakulah dan sudah biasa bagawi nyatanya wayahini kulihat inya bauju tunggal bigian jua mambaca,” ujar Garbus mamahapak Palui.

“Samalam bujur haja aku bauju mambaca, tapi wayahini sudah lancar, cuba dangarakan aku mambaca surat kabar ini,” ujar Palui mambaca imbah inya mamasang kacamata.

“Oooo......... jadi imbah ikam bakacamata, lalu lancar mambaca?” ujar Garbus.

“Barakat kacamata inilah maka aku lancar mambaca karna memang kacamata ini adalah kacamata mambaca,” ujar Palui baagak

“Kalu kaya itu isuk kita tulakan ka pasar umpat manukar kacamata pintar

mambaca itu,” ujar Tulamak. Lalu isuknya, bubuhannya tulakan ka pasar mancari’i tuku wadah Palui manukar kacamata lancar mambaca.

“Nah, itu nah sama wan kacamata Palui, kacamata putih tabal kacanya,” ujar Tulamak wan Garbus. Imbah mamasang kacamata tabal itu lalu inya minta cariakan suratkabar handak mambaca.

“Huruf-hurufnya baganal Bus ai, tapi aku kada kawa mambaca jua,” ujarnya.

“Kacamata ini kacamata kaur gasan mambaca, jadi kada kacamata pintar mambaca. Mata sampiyan kaurlah?” ujar panjaga tuku manakuni.

“Mata kami baik haja, hanya kami balum tamat sakulah paket kejar A jadi kami balum lancar mambaca,” ujar Garbus mangaku.

“Kalu balum bisa mambaca baiknya manukar kacamata hirang haja, biar kada bisa mambaca tapi aksi,” ujar panjaga tuku mahuhulut bubuhannya. (tam)

Source: BPost